Алишмасман, сизни эчки- улоғимга,
Жавоб беринг менинг битта саволимга,
Секингина айтинг майли, қулоғимга,
Кайнонажон, куёвманми, ёвманми, мен?
Аҳилликда тенги йўқдир юртда божа,
"Сиз шоирсиз, сўранг"-дейди, ўрта божа,
Бир саволга жавоб излар, тўртта божа,
Кайнонажон, куёвмизми, ёвмизми, биз?
Ростдан севиб қолганман-а, қизингизни,
Кўнглига қўл солганман-а, қизингизни,
Сизни кўриб олганман-а қизингизни,
Қайнонажон, куёвманми, ёвманми, мен?
Янги куёв чоғимдаги ҳавас қани,
Орамизга қил сиғмайди, "Камаз" қани,
Тўйда ваъда қилганингиз - "Дамас" қани,
Қайнонажон, куёвманми, ёвманми мен?
Танлагансиз, қадди-бастим, қоматим, деб,
Оқ булутдай омонат бир омадим, деб,
Эркалайсиз, "Шўрпешона ўғлим" деб,
Қайнонажон, куёвманми, ёвманми мен?
Сизни Она, ўғлингизни дедим укам,
Бахт бобида сиз ҳамиша бўлинг бекам,
Қайнонасин шеърга солган шоирлар кам,
Қайнонажон, куёвманми, ёвманми мен?
Бебаҳосиз - тўртта тилло йиққанингиз,
Тенги йўқсиз – куёв гапин уққанингиз,
Бир айбингиз - чиройли қиз туққанингиз,
Кайнонажон, куёвманми, ёвманми мен?
Гулдай юринг, тўкилмасин, охорингиз,
Шодон ўтсин шомларингиз, наҳорингиз,
Қутлуг бўлсин, олтмиш икки баҳорингиз,
Оҳ, онажон, куёвмасман, ўғлингизман!
Адҳам ҲАЛИЛОВ.
